16 депутаттық мандатқа 87 адам бақ сынайды

«Қазір сенат депутаттығына бақ сынауға бел буған 56 кандидат тіркелді. 7-шілдедегі мәліметтерге қарағанда, барлығы 87 адамның кандидатурасы ұсынылған», - деп бейсенбі күні Астанада өткен отырыста ОСК төрағасы Қуандық Тұрғанқұлов мәлім етті. «Осылайша, бір депутаттық мандатқа 5 адамнан келіп тұр», - деп атап өтті ол. Қ.Тұрғанқұловтың айтуынша, сенат депутаттығынан үміткерлердің 15-ін жергілікті мәслихаттар, қалған 72 үміткер өзін-өзі ұсынған. Кандидаттар саны жағынан Жамбыл облысы алға шықты, облыс бойынша 9 адамның кандидатурасы тіркелген. Үміткерлердің арасында төрт әйел бар. 86 үміткердің тоғызы сенаттың қазіргі депутаттары. Ұсынылған кандидаттардың 42-сі «Нұр Отан» билік партиясының мүшелері. «Ақ жол», «Ауыл», «Руханият» және Патриоттар партиясы да бір-бір үміткерден үкілеп отыр. 24 адам ешқандай партияның мүшесі емес, 17 үміткер өздерінің қай партияға кіретінін көрсетпеген. Сенат депутаттарын сайлау 19-тамызда өтеді. Бұ жолғы сайлауда 14 облыс пен Алматы және Астана қалаларынан бір-бір депутаттан, барлығы 16 депутат сайлануы тиіс.