«20 қарашаға дейін салық органдарына мүлікті заңдастыруға қатысты 1818 ,3 млн. теңгеге 13 923 тапсырыс келіп түсті. Жалпы 1585,1 млн. теңгеге 13 290 тапсырыс бойынша мүлік заңдастырылды»,- деді Н.Рахметов қаржы министрлігінің кеңейтілген отырысында.
Салық комитетінің басшысы 796,5 млн. теңге заңдастырылған қаражаттың үлесі екенін айтты. Заңдастырылған ауыл шаруашылығы техникасының сомасы 462,8 млн. теңгені құрайды, оның ішінде 347,4 млн.теңгесі мүлікті заңдастыруға төленетін төлем.
Салық органдарына түсіп жатқан тапсырыстың басым бөлігі ауыл шаруашылығы техникаларын заңдастыруға қатысты. Н.Рахметовтың айтуынша, 20-қарашадағы жағдай бойынша мүлікті заңдастыруға Шығыс Қазақстан облысының салық органдарына (3254), Ақмола (2190),Солтүстік Қазақстан (2016) және Қостанай облысының салық органдарына (1475) арыз түскен. Ең аз арыз Астанада (42), Алматыда (47) және Маңғыстау облысында (42) берілген.
«Жүргізілген сараптама қортындысына сүйенсек, аталған аймақтарда мүлікті заңдастыру туралы түсініктеме жұмыстары баяу жүргізіледі, ақпарат жетіспейді.Немесе жүргізіліп жатқан шаралар нәтижесіз»,-дейді салық комитетінің басшысы.
Ал, қаражатты заңдастыру арыздарын қараған кезде аталған аймақтардың ішінде Алматы бойынша(271,2 млн.теңге), Астанада (260 млн. теңге) және Қарағанды облысында (191,5 млн. теңге) ең көп заңдастырылған.
Н.Рахметовтың мәліметі бойынша, науқын басталған кезден бері бюджетке 374,9 млн. теңге көлемінде түскен.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
