2003-жылдың 1-қазанында мемлекеттік бюджетке түскен түсімдер көлемі 775,9 млрд. теңгені құрап, өткен жылғыдан 29,8%-ке өсті

Есеп берген кәсіпорындар мен ұйымдардың деректері бойынша 2003-жылдың қыркүйегінде табыс көлемі 64,2 млрд. теңге сомасында қалыптасты, бұл 2002-жылғы осы мерзіммен салысырғанда 49,7%-ке артық. Пайдалылық деңгейі — 20,3%. Есеп берген кәсіпорындардың жалпы санында пайдасыз жұмыс істеген кәсіпорындардың үлесі 34,9% болды.

2003-жылдың 1-қазанында Қазақстан Республикасы Ұлттық Банкінің деректері бойынша екінші деңгейдегі банктердің экономика салаларына таратқан несиесі 879,4 млрд. теңгені құрады. Несиелер көлемінің тұрақты өсу сипаты байқалады. Несиелік салымдардың жалпы көлемінде ұзақ мерзімді несиелер үлесі — 62,5%, шетел валютасымен берілген несиелер үлесі — 56,7%-ті құрайды. 2003- жылдың 1- қазанында банк жүйесіндегі депозиттер көлемі 766,9 млрд теңгені құрады, бұл 2002- жылғы 1-қазандағыдан 44,6% көп, соның ішінде тұрғындардың депозиттері (салымдары) тиісінше — 308 млрд. теңге болды, бұл 2002-жылғы 1-қазандағыдан 35%-ке артық.