Жарияланды: 880

2003-жылы Ақтау теңіз сауда айлағынан 6 млн. тонна мұнай жөнелту жоспарланды

Ақтау теңіз сауда айлағы арқылы мұнай тасымалдау көлемі алғашқы жарты жылда 3 млн. 227,637 мың тоннаны құрап, өткен жылдың осы мерзіміндегі көрсеткіштен 24 процентке артты (2002-жылғы осы мерзімде 2 млн. 294,215 мың тонна мұнай тасымалданған болатын) . Бұл туралы "Ақтау теңіз сауда айлағы" РМК-ның директоры Талғат Әбілғазин KZ-today тілшісіне хабарлады.

Т.Әбілғазиннің айтуынша, биыл бұрын-соңды болмаған рекордтық мұнай тасымалдау көлеміне қол жеткізіледі. Тек биылғы маусым айында теңіз айлағы арқылы 666361 тонна мұнай және мұнай өнімдері тасымалданды. Ал өткен жылғы осы мерзімде бұл көлем 500-550 мың тоннаны құраған болатын. Қазір теңіз айлағынан жөнелтілетін мұнай және мұнай өнімдерінің 50 проценті Бакуге, 45 проценті Махачкала қаласына, 5 проценті Иранның Некка айлағына жіберілуде. РМК директорының айтуынша, айлақ кірісінің басым бөлігін мұнай тасымалдаудан түсетін пайда құрап отыр. Биылғы жылы Ақтау сауда теңіз айлағы арқылы 6 млн. тонна мұнай және 1 млн. тоннадан астам басқа да жүктер тасымалдау жоспарланған. Ал өткен жылы айлақтан 6 млн. 345 мың 703 тонна жүк жөнелтілсе, оның 793 мың 232 тоннасы құрғақ жүктер, 5 млн. 552 мың 471 тоннасы мұнай және мұнай өнімдері болды. Қазақстан Баку-Тбилиси-Джейхан экспорттық мұнай құбырына қосылғаннан кейін, шамамен 2008-2009-жылдарда Қазақстан мұнайын Ақтау теңіз айлағы арқылы тасымалдау ауқымын ұлғайту туралы мәселе қойылмақ. Жоба аясында Каспий теңізі пароход шаруашылығы мен "ҚазақМұнайГаз" ҰК-ның құрамындағы "Қазақтеңізкөлікфлоты" мемлекеттік компаниясының танкерлері пайдаланылмақ. Аталмыш жоба аясында Қазақстан Ақтау теңіз сауда айлағынан қазір тасымалданып отырған 6 млн. тоннаның сыртында қосымша 5-10 млн. тоннаға дейін мұнай жөнелте алады. Ал айлақтың мұнай тасымалдау қуаты жылына 8 млн. тонна көлемінде. Т.Әбілғазиннің айтуынша, тасымалданатын мұнай және мұнай өнімдерінің ауқымы ұлғаятынына қарамастан айлақта қосымша қуат көздерін салу туралы мәселе әзірге көтерілген жоқ. Қазір "Қазақтеңізкөлікфлоты" мемлекеттік компаниясы өз қарамағындағы 4-ші және 5-ші мұнай құятын причалдарды жаңалау жұмысын жүзеге асыруда. Соның нәтижесінде теңіз айлағы арқылы тасымалданатын мұнай көлемін 10 млн. тоннаға дейін жеткізу мүмкіндігі туады.

Пікір қалдырыңыз

Пікір қалдыру тіркелген пайдаланушылар ғана мүмкін

Закрыть