2004-жылдың маусым айында Алматыда өтетін халықаралық донорлар конференциясында Қазақстандағы экологиялық проблемаларды шешуге арналған 100-дей жоба ұсынылады

2004-жылдың 9-10-маусымында Алматыда өтетін халықаралық донорлар конференциясында Қазақстандағы экологиялық проблемаларды шешуге арналған 100-дей жоба ұсынылады. Бұл туралы бүгін, 25-мамырда Астанада экология және тұрақты даму жөніндегі Азия-Тынық мұхиты аймақтық форумының (APFED) бесінші отырысында ҚР қоршаған ортаны қорғау министрі Айткүл Самақова хабарлады.

Министрдің айтуынша, «қоршаған ортаны қорғау саласында қызмет ететін дүниежүзілік жетекші қаржылық ұйымдар мен бағдарламалар бас қосуға атсалысуға алдын-ала келісім берді». Конференцияға Әлемдік банк, ЮНЕП, БҰҰ Даму бағдарламасы, ТАСИС , Ғаламдық экологиялық қор өкілдері қатысады деп күтілуде. Конференцияны ұйымдастыруға Азия Даму банкі тікелей қолдау көрсетуде.

Министрдің айтуынша, бас қосу Экономикалық ынтымақтастық және даму ұйымының қоршаған ортаны қорғау бағытындағы іс-шаралар жоспарын жүзеге асыру жөніндегі арнаулы жұмыс тобының кезекті отырысына арналған. Бұл кездесу де 11-маусымда Алматыда өтеді.