2006-жылы қорғаныс министрлігінің бюджеті 20 млрд. теңгеге ұлғайтылады

2006-жылы қорғаныс министрлігінің бюджеті былтырғымен салыстырғанда 20 млрд. теңгеге ұлғайтылып, 81 млрд. теңгеге жетеді деп күтілуде. Бұл туралы бүгін, 26-қыркүйекте ҚР қорғаныс министрі Мұхтар Алтынбаев үкіметтің көшпелі отырысында мәлімдеді,- деп хабарлайды KZ-today тілшісі.

«Бюджетіміз жеткілікті. Ол жауынгерлік дайындықты жетілдіруге, қару-жарақты жаңалау мен жөндеуге мүмкіндік береді»,- деді министр.

М.Алтынбаевтың айтуынша, 2006-жылғы бюджеттің 27 проценті қару-жарақ, техника және құрылыс сынды даму мақсаттарына жұмсалады. Бюджеттің басым бөлігі әскерилерді қаржыландыру мөлшерін арттыруға арналмақшы.
Еліміздің қос палаталы парламентінің тарихында алғаш рет үкімет сағаты парламент қабырғасында емес, ҚР қорғаныс министрлігінің десанттық-шабуыл тобының полигонында өтті. Депутаттар қару-жарақ түрлерімен және десант әскерлерінің жауынгерлік дайындығымен танысты.