Бұл туралы Caravan.kz медиа порталы Sputnik.kz-ке сілтеме жасап хабарлайды.
Астана қаласының әкімі Жеңіс Қасымбек азық-түлік қауіпсіздігіне байланысты елордада қандай іс-шаралар жүзеге асып жатқаны туралы айтты.
«RnR Group» ЖШС (Сарайшық ауданы) кәсіпорындар кешенінің жұмысымен таныстым. Ол – тәулігіне 25 тонна өнім шығаратын нан зауыты және көкөніс қоймасы (6 мың тонна). 2026 жылы тәулігіне 100 тонна сүт өңдейтін зауыт ашу жоспарланып отыр. Бұл жобаға тартылған жеке инвестициялар сомасы 8,1 млрд теңгені құрады. Қазірдің өзінде 250-ге жуық жұмыс орны ашылд», — деп жазды Жеңіс Қасымбек әлеуметтік желідегі жазбасында.
Ол сонымен қатар елордадағы көкөніс қоймасына да барды.
«SAIANUR VIP-SERVIS» ЖШС (Байқоңыр ауданы) заманауи көкөніс қоймасына бардым. Инвестиция сомасы – 1,8 млрд теңге, мұнда 200 жұмыс орны ашылды. 8 мың тонна көкөніс қоймасы жеміс пен көкөніс өнімдерінің бағасын тұрақтандыруға мүмкіндік береді», — деді әкім.
Биыл жеке инвестициялар есебінен Сарайшық ауданында «Технодом» («ОРПТ» АҚ) дүкендер желісінің орталық қоймасын ашу жоспарланып отыр. Жобаға тартылған инвестиция 11,1 млрд теңгені құрайды, сол сияқты 200-ге жуық жаңа жұмыс орны ашылмақ.
Мәселен, былтыр қалада 49 инвестициялық жоба қолданысқа берілді. Бұл 301 млрд теңге көлемінде жеке қаржы тартуға және 4 мың 100 жұмыс орнын ашуға септігін тигізді.
Биыл тағы 55 инвестициялық жобаны іске қосу жоспарланып отыр.