Алматы-Қапшағай, Алматы-Қорғас және Астана-Теміртау жолдарында төлемнің жаңа жүйесі пайда болады, деп хабарлайды КТК арнасы.
Аталған жолдарда негізгі жұмыстар аяқталып, терминалдар орнатылған.
Ұзындығы 42 шақырымды құрайтын Алматы-Қапшағай жолымен жүру үшін 100 теңгеден 200-ге дейін ақша төлеу қажет.
Ал ұзындығы 295 шақырым болатын Алматы-Қорғас жолында жеңіл көлік үшін тариф – 300-600 теңге аралығында.
Астана-Теміртау автожолының ұзындығы 134 шақырым болады. Бұл жолда жүру үшін 200-400 теңге аралығында ақша төлеу керек.
Аталғандай, алдын ала төлем бойынша жүру арзанға түседі. Ал түскен ақша жолдардың жөнделуіне, жол белгілерінің орнатылуына және қысқы уақытта арнайы реагенттермен өңделуіне жұмсалады.
Аталған үш автожолмен жүру шұғыл қызметтер, рейстік және қалааралық автобустар үшін ғана тегін болады, дейді «Қазавтожол» ұлттық компаниясындағылар.
Сондай-ақ, ақылы жолдарға жақын тұратын жүргізушілерге жылдық абонемент сатып алу ұсынылып отыр. Оның құны – 1 000 теңге.
