«Азия ойындарының Алау құтысының тұсаукесері қазанның 22-сі күні өткізілетін болады. Естеріңізде болса, барлық Олимпиада ойындарында құты ойындарға 100 күн қалған кезде жағылады. Бұл қалыптасқан дәстүр», — дейді ол.
С.Құранбек атап көрсеткендей, құтының тұсаукесері әсерлі үлкен шоу бағдарламаның сүйемелдеуімен Астанадағы Тәуелсіздік сарайында өтеді. «Шараның маңызы да, жауапкершілігі де жоғары болғандықтан оған тыңғылықты дайындықтар бүгіннен жүргізілуде», — деді.
Дирекция өкілінің сөзіне қарағанда, Азиада Алауының құтысы әлі дайын емес.
Бұған дейін хабарланғандай, Алау құтысы мен онымен бірге Эстафета барысында өңірлерді бірге аралайтын — жылжымалы қазандықты дайындау, олимпиадалық ойындардың атрибутикаларын әзірлеумен айналысатын қытайлық компанияға тапсырылды.
Құтының салмағы 1 келі 350 грамм шамасында, ұзындығы — 65-66 сантиметр. Факел түсті металдардың қоспасынан дайындалуда және ол ауа райының барлық жағдайына төзімді болады. Оның дизайнының негізіне Алматы маңында табылған, біздің жыл санауымызға дейінгі І-ІІІ ғ. жататын сақтардың жарықтандырғыш құралы алынды. Ұлттық нақыштар жылжымалы қазандықта да бедерленетін болады.