Осы күндері Астана әкімдігі қалада Абай Құнанбайұлына арналған мерекелік күндерді атап өту шаралары: Абай оқуларын, оның ескерткішіне гүл шоқтарын қою және концерттер ұйымдастырып жатыр. Кеш аталмыш шаралар циклінің аясында өткізілді.
Сарай сахнасында қала қонақтары мен тұрғындары назарына Абайдың «Май түні», «Көзімнің қарасы», «Татьянаның әні», «Айттым сәлем, Қаламқас», сынды танымал ақындық және музыкалық туындылары, сонымен қатар Латиф Хамидидің «Абай» операсынан ариялар ұсынылды.
Қазақтың бас ақыны — Абайдың шығармаларын Қазақстанның халық әртістері, елге еңбектері сіңген мәдениет қайраткерлері Қияқбай Асамбаев, Жанат Шыбықбаев, Қайрат Байбосынов, сондай-ақ республикалық және халықаралық байқаулардың лауреаттары Ербол Сәдуақас, Перизат Тұрарова, Бәтима Изенаева, Данияр Мұқан, Азамат Жылтыркөзов орындады.
Әртістерге Бас дирижер, ҚР Еңбек сіңірген мәдениет қайраткері, профессор Айтқали Жайымовтың жетекшілік етуімен, Астана халық аспаптары мемлекеттік филармониясының оркестрі музыкалық сүйемелдеу жасады.