Әбілов өзін бірқатар сыбайлас жемқорлық істерге қатысы бар деп айыптаған қаржы полициясының мәлімдемесіне қарсы сотқа шағымданбақшы

Қазақстандық экс-кәсіпкер Болат Әбілов ҚР экономикалық және жемқорлық қылмыстармен күрес агенттігі төрағасының орынбасары Рүстем Ыбырайымовтың 5-тамызда баспасөз мәслихатында өзін сыбайлас жемқорлық істерге қатысы бар айыптаған мәлімдемесіне қарсы сотқа шағымданбақшы. Бұл туралы Б.Әбілов бүгін, 9-тамызда Алматыда өткен баспасөз мәслихатында мәлімдеді,- деп хабарлайды KZ-today тілшісі.

5-тамызда Астанада өткен баспасөз мәжілісінде Р.Ыбырайымов «Бутя-капитал» ИЖҚ-ның іс-қызметіне жүргізген тексерулер нәтижесінде қылмыстық істер қозғалғанын және Б.Әбіловтың 3,5 млн. теңге көлемінде салық төлемеу дерегіне қатысты қылмыстық іс қозғалған «C&B» ЖШС-не қатысы бар екенін мәлімдеген болатын.

Б.Әбілов өз қорғаушыларының баспасөз мәслихатына қатысты материалдарды жинап жатқанын хабарлады. «Қазір біз бейнематериалдарды жинап жатырмыз. Бізге Р.Ыбырайымовтың сөйлеген сөзі жазылған кассета Астанадан жіберілмекші. Егер онда Р.Ыбырайымов баспасөз баянында жазылғандардың бәрін айтқан болса, онда біз абырой мен адал атқа кір келтіретін ешбір құжатпен бекітілмеген, жалаң айыптаулар үшін ар-ұжданды қорғау туралы сотқа міндетті түрде шағым түсіретін боламыз».
Шағым Р.Ыбырайымовқа қатысты ма, әлде қаржы полициясына қатысты бола ма дегенді Б.Әбілов нақтылаған жоқ.