Әділет министрлігі бағдарламалық өнімдерге қатысты авторлық құқықты қорғау мәселесін заңнамалық тұрғыда реттеуді ұсынады

«Іс жүзінде бағдарламалық өнімдерге қатысты авторлық құқықты қорғау мәселесіне қатысты көптеген дау-дамайлар туындап жатады»,- деді ҚР әділет министрінің орынбасары Серік Нұғманов заң жобасының тұжырымдамасын талқылауға арналған дөңгелек үстелде.

Қазіргі таңда бағдарламалық қамтамасыздықты пайдалануға қатысты қарым-қатынастар «Авторлық және жанама құқықтар туралы» заңмен реттеледі, деді вице-министр. «Заңда бағдарламалық қамтамасыздықтар әдеби, драмалық және музыкалық шығармалармен теңестірілген. Бірақ авторлық топшылауды қамтамасыз ететін мемлекеттік тіркеу тетігі жасалмаған»,- деді ол.
«Бағдарламалық қамтамасыздық нарығында балама бағдарламалар мен бір ғана бағдарламалық өнімнің түрлі нұсқалары көбейіп, бағдарламалық қамтамасыздықтың сапасы төмендеді. Ортақ стандарт деген атымен жоқ»,- деді ҚР әділет министрлігінің санаткерлік меншік құқығы жөніндегі комитеті төрағасының орынбасары Бекет Әлиғожин.
Б.Әлиғожиннің пікірінше, бағдарламалық қамтамасыздық саласындағы қарым-қатынастарды дұрыс реттемеу отандық ақпараттық және телекоммуникациялық технологияларды дамытуға септігін тигізе алмайды.