Халықаралық ақпарат құралдары кеше және бүгін АҚШ президенті Дональд Трамп әкімшілігі Украинадағы қарулы қақтығысты бейбіт жолмен реттеу жоспарын дайындап жатқаны туралы хабар таратты, деп хабарлайды Caravan.kz медиа порталы.
Құжат әзірге ресми түрде жарияланған жоқ. Алайда Reuters және өзге де басылымдардың дерегіне қарағанда, ол 28 тармақтан тұрады. Жоспар соғысты тоқтату тетіктерін, Украинаға берілетін қауіпсіздік кепілдіктерін, Еуропадағы жаңа қауіпсіздік жүйесін және АҚШ-тың Ресей мен Украинамен қарым-қатынасына қатысты бөлімдерді қамтиды.
«Трамп әкімшілігі Украинадағы соғысты тоқтатудың жаңа жоспарын әзірлеу бойынша Ресеймен жасырын түрде кеңесіп жатыр», — деп хабарлады АҚШ және Ресей шенеуніктері Axios басылымына.
Жоспарда бірінші кезекте Киевтің белгілі бір аумақтық талаптардан бас тартуы қарастырылған: Крымның Ресей құрамында екенін мойындау, сондай-ақ Донбасс пен елдің шығысындағы Ресей бақылауындағы бірқатар аумақтарды Мәскеуге беру мәселесі. Сонымен қатар Херсон мен Запорожье облыстарындағы қазіргі майдан шебін бекіту ұсынысы талқылануда.
Құжатта Украина әскерінің санын қысқарту туралы да айтылған. AFP агенттігінің дереккөздері Қарулы күштердің жалпы саны шамамен 400 мың адам деңгейіне дейін азайтылуы мүмкін екенін жеткізеді.
Жоспарда қашықтан соққы беру мүмкіндігі бар қаруларды шектеу мәселесі де бар. Украинаға алыс қашықтықтағы шабуыл қаруынан бас тарту және ауыр әскери техника түрлерін айтарлықтай қысқарту ұсынылады.
Бұдан бөлек, Донбасс аймағының бір бөлігінде демилитаризацияланған аймақ құру мүмкіндігі қарастырылған. Әскерді шегіндіру және ауыр қаруды қысқарту талаптары екі тарапқа да бірдей қолданылуы тиіс.
БАҚ мәліметінше, жоспарды әзірлеуге АҚШ президентінің арнайы өкілі Стив Уиткофф пен Ресейдің Тікелей инвестициялар қорының басшысы Кирилл Дмитриев қатысып жатыр.
Украина ресми түрде бұл процестің бір бөлігі болмағанын және құжат мазмұнымен тек жалпы деңгейде ғана таныс екенін айтты. Аумақтың бір бөлігінен бас тарту және, мысалы, орыс тіліне мемлекеттік мәртебе беру сияқты ұсыныстарды Киев «қабылдануға келмейтін» деп атады.
Ресей болса, өз ұстанымының өзгермегенін және «нақты жағдайға» сүйенетінін мәлімдейді.
Axios ақпаратынша, кеңестер кезінде «Ресейдің позициясы ескерілді» деп Кирилл Дмитриев айтқан.
