Алдағы үш жылда Қазақстандағы экономикалық даму қарқыны 8-8,5 процент деңгейінде сақталады - Азия даму банкі

Қазақстанда экономикалық даму қарқынының жыл сайынғы болжамдық көрсеткіші 2005-2007-жылдар аралығында 8-8,5 процент төңірегіндегі жоғарғы деңгейде қалады. Ал 2004-жылы Қазақстанда Ішкі Жалпы Өнім 9,4 процентті құрады. Бұл туралы бүгін, 6-сәуірде Алматыда өткен баспасөз мәслихатында Азия даму банкінің Қазақстандағы тұрақты өкілдігінің директоры Казухико Хигучи мәлімдеді,- деп хабарлайды KZ-today тілшісі.

Экономикалық жоғарғы өсім мемлекеттің экономиканы диверсификациялау бағытындағы белсенді жұмыстарының арқасында және Қазақстаннан экспортталатын мұнай мен металға деген сұраныстың жоғары болуы есебінен қамтамасыз етіледі деп болжануда. Бұл туралы Азия даму банкінің аймақтағы экономикалық ағымдар туралы «Азиядағы даму перспективалары» атты жыл сайынғы есебінде айтылған.

К.Хигучидің айтуынша, Қазақстанда экономиканың шикізат саласы, соның ішінде өңдеу өнеркәсібі, құрылыс индустриясы мен қызмет көрсету салалары үлкен қарқынмен дамиды деп болжам айтуға объективті алғышарттар қалыптасқан. Дегенмен, баяндама авторларының пайымдауынша, мұнайгаз секторы — экономикалық өсімнің негізгі қозғалтқыш күші ретінде қала бермек. Азия даму банкінің болжамына сәйкес, алдағы үш жылда брэнт маркалы мұнайдың орташа құны бір баррелі үшін 37-41 доллар деңгейінде сақталады.