Бұл автобустар «Алматы ГазИнжиниринг» компаниясының демеушілігімен алынған.
Арнайы жабдықталған бұл автобустар арбаға танылған жандарды ғана емес, барлық 1-топтағы мүгедек адамдарды қаланың кез-келген жеріне тегін жеткізіп отырады.
«Мүгедек жандардың өздерін қоғамдағы барлық адамдардай сезінуіне және қоғамдық жұмыстарға араласуына жағдай жасау керек. Өкінішке орай мұндай қадамдар біздің елде енді ғана жасалып жатыр. Біздің бастамамызды мүмкіндігі бар еліміздің басқа да компаниялары мен ұйымдары жалғастырып әкетсе нұр үстіне нұр болар еді», — дейді «Алматы ГазИнжиниринг» компаниясының директоры Татьяна Перехова.
Жиын барысында қалалық мүгедек балалардың ата-аналары қауымдастығы, қалалық мүгедектер қоғамы және тағы басқа ұйым өкілдері қатысып, мүгедек балалардың концерттік бағдарламасын тамашалады. Балалар өздері шығарған өлеңдерін оқып, театрландырылған қойылымдарын ұсынып, би билеп салтанатты жиынның көркін қыздыра түсті.
Алайда өзге топтағы мүгедектігі бар балалардың ата-аналары мұндай жәрдемнен балаларының тысқары қалғандарына наразылықтарын байқатты. «Менің балам — екінші топтағы мүгедек. Оған қоғамдық көліктерде жүруге жеңілдік жасалған, алайда қалалық автобустарда сау адамның өзі әрең жүреді, сондықтан мұндай автокөлікпен басқа да топтың мүгедектерін қамтыса екен», — дейді Гүлжан Самарханова.
