Байсерке ауылындағы №12 мектеп оқушыларының ата-аналары тілшілерді осындай қошеметпен қарсы алды. Қуануға себеп те бар. Енді оқу ордасында ақшаның жиналатынын бүкіл ел білмек.
-Бірінші орын алып отырған мектепті бұлай табалауға болмайды!
-Неге ақша сұрайды онда?! Ақша, ақша, ақша!!!
-Ақша сұрап жатқан жалғыз 12-ші мектеп пе?
Ата-аналар жікке бөлініп, осылай жиналыс соңы жанжалға ұласты. Өйткені жұрт бітпейтін ақша жинаудан жалыққан. Мәселен, Аяз ата мен Ақшақарды киіндіру және жаңа музыкалық аппаратура алу үшін 80 мың теңге қажет екен.
Эльмира Омарбекова, Байсерке ауылының тұрғыны:
–Жылда Аяз атаға, Ақшақарға киім аламыз. Неге біз оны алуымыз керек? аппаратура 80 мың теңге дейді, ол қайдан шығып жатқан ақша?!Мен 40-қа келдім, бірақ Аяз ата мен Ақша қардың жыл сайын әдемі киінгенін көрген жоқпын.
Ешкім оқымайтын газеттерге мәжбүрлеп жазылу да ата-аналардың әбден мезі еткен. Әр оқу жылында аудандық газеттерге жазылу үшін 3 жарым мың теңге керек. Ал жөндеу жұмыстарына қосымша мың жарым, ал бор мен шүберекті сатып алуға әр оқушыдан ай сайын 100 теңгеден жиналады екен.
Жанар Несіпбекова, Байсерке ауылының тұрғыны:
–Екінші кластың шкафына дейін, гардероб, жалюзға деп ақша жинайды мысалы. Гардероб тұрғанда біз не үшін класқа шкаф алуымыз керек?
Шыдамы шегіне жеткен ата-аналар мектеп басшылығын жерден алып, жерге салуға дайын еді. Бірақ директор отбасылық жағдайына байланысты орнынан табылмай, орынбасары өзіне шаң жуытқан жоқ.
Сандуғаш Пернебекова, №12 мектеп директорының орынбасары:
-Біздің мектепте аппаратура жоқ. Жылда жалдамалы болады бізде. Жылда жалдаймыз.
-Енді биыл бұл мәселені қалай шешпек болдыңыздар?
-Биыл енді ата-аналарды соған ақылдасуға шақырған болатынбыз. Ата-ананың келісімімен болады, онсыз ештеңе шешілмейді.
Мұғалімдерді жұрттың алдында жеккөрінішті қылып, газеттеріне дейін жаздыруға мәжбүрлейтін аудандық білім бөлімінде де тұщымды жауап беретін жан табылмады. Ал жікке бөлінген ата-ана ақыры ортақ мәмлеге келе алмай тарқасты. Енді барлығында тек бір тілек – жиналыста айтылған ақиқат балалардың үлгеріміне кедергі келтірмесе болғаны.
