Марапаттау рәсімі денсаулық сақтау басқармасының 85 жылдығына арналған «Медицинаның өзекті мәселелері» деп аталатын мерейтойлық халықаралық конгрестің ашылуы барысында өтті.
Онда ҚР Денсаулық сақтау министрлігінің бұйрығы бойынша Медициналық көмекті ұйымдастыру департаментінің директоры Ажар Төлеғалиева «Денсаулық сақтау ісіне қосқан үлесі үшін», «Денсаулық сақтау ісінің үздігі» төс белгілері мен министрліктің алғыс хаттарын табыс етті. Алматы қаласы әкімінің орынбасары Серік Сейдуманов дәрігерлерді әкімнің құрмет грамоталарымен, ал шетелдік серіктес дәрігерлерді алғыс хаттармен марапаттады.
Серік Сейдумановтың айтуынша, 1927 жылдың 1 қазанында Алматы қаласы денсаулық сақтау басқармасы құрылған кезде оның құрамында меңгеруші мен хатшы ғана қызмет атқарған. Қазіргі таңда 82 қалалық, 40-тан астам республикалық, 950 жекеменшік медициналық мекеме бар. Ал қалалық мекемелердің өзінде 5 мыңға жуық дәрігер мен 9 мыңнан астам орта медицина қызметкерлері жұмыс жасайды.
