Филиппиндік файтер Қазақстанға тек жеңіс үшін келгені анық. Ушу-Саньдадан әлемнің үш дүркін чемпионы, сондай-ақ бірнеше халықаралық турнирларда топ жарған Ролдан аралас жекпе-жекте жеңіліп көрмеген. Қазақстандық шеберде ММА әлемінде жауырыны жер иіскемеген. Еркін күрестен спорт шебері. Жапонияда өткен халықаралық турнирдан жеңіспен оралған болатын. Бұл кеште сондай-ақ, Қайрат Ахметов пен қытайлық Яо Шуо арасындағы кездесу тартысқа толы болары сөзсіз.
Асұлан Тоқтарбаев, “Алаш Прайд” клубының өкілі:
— Дайындығым жақсы. Бізді тек жеңіске тәрбиелейді. Сондықтан ертең барымды салам. Қарсыласым да осал емес. Алдын-ала ештеңе айта алмаймын.
Алматыда спорттық гимнастикадан ашық чемпионат мәресіне жетті. Жекелей және көпсайыстан сынға түскен спортшылар аянып қалған жоқ.
Алматыдағы чемпионатқа жергілікті шеберлермен бірге Қырғызстан мен Өзбекстан елінен келген 120-ға тарта спортшы қатысуға ниет білдірген. Жақында бой көтерген жаңа кешенде гимнастикамен айналысуға барлық жағдай жасалған. Ал жарыс қорытындысы бойынша көршілес елден келген өрендер 10 алтынды қанжығасына байлады. Ал спорт шеберлері арасында Мөлдір Әзімбай, Жанерке Дүйсек, Екетерина Чуйкина және Нұртас Қожақов пен Виктор Кочерин сынды спортшылар чемпион атанды. Енді жеңімпаздар екі айдан кейін өтетін Президент Кубогіне дайындалмақ.
Чемпиондар лигасының плей-офф кезеңіне жолдама алған командалар өз қарсыластарын білді.
Швейцарияның Ньон қаласында өткен жеребе тарту рәсімі үздік 16 команданың алдағы қарсыласын анықтап берді. Соқыр жеребе Испания чемпионы мадридтік “Реал” мен “Манчестер Юнайтедттің” жолын түйістірді. Сондай-ақ, “Милан” мен “Барселона” өзара кім мықтыны анықтамақ. Ал дортмундтық “Боруссия” украиналық “Шахтермен” кездессе, лондондық “Арсенал” мюнхендік “Бавариямен” жартылай финал жолдамасын сарапқа салмақ. Ширек финалда бұдан өзге “Галатасарай” мен “Шальке”, “Селтик” пен “Ювентус” “Валенсия” мен “ПСЖ” және “Порту” мен “Малага” кездеспек.
Ивуарлық жартылай қорғаушы Яя Туре Африканың үздік футболшысы болып танылды. Қара құрлықтың футбол шенеуніктері Кот Ивуар құрамасының ойыншысын осымен екінші жыл қатарынан мәртебелі сыйлықпен марапаттап отыр.
“Манчестер Ситиде” өнер көрсететін футболшы өз құрамасын Африка кубогының финалына дейін жеткізген болатын. Оған қоса манчестерліктермен бірге Англия чемпионы атанды. Ал оның отандасы Дидье Дрогба бұл жолы екінші орыннан көрінді. “Барселонада” доп теуіп жүрген камерундық Александр Сонг үздік үштікті түйіндеді.