Жас режиссер Фархат Шәріповтың бұл дебюттік фильмін көптеген журналистер «жылдың көптен күткен премьерасы болмақ» деп пайымдауда.
Фильм ауыл баласының қаланың түнгі өміріне енген ауыр тағдыры жайында. Студент бала «жеңіл» өмірдің шырмауына түсе ме, қала өмірінде өз-өзін сақтай ала ма — бұның барлығын көрермендер шығарманың соңында біле алады. «Мен түсірілімді бастамай тұрып сценарийдің артық, кем жерлерін түзеу үшін, көп адамдарға көрсетіп, пікірлерін білдім. Түсіру соңына дейін таңдаған ұстанымым бойынша жүруге тырыстық», деді Фархат Шәріпов.
Тамыздың 29-ы күні өтетін премьераға елімізге белгілі мәдениет қайраткерлері, танымал актерлар мен режиссерлар, продюссерлер мен отандық шоу-бизнестің жұлдыздары, сонымен қатар, фильмнің түсіру тобы мен киностудияның басшылары қатысады.
Фархат Шәріпов 1983 жылы туған, Т.Жүргенов атындағы Ұлттық Өнер академиясын (режиссура, дыбыс режиссурасы) және «New York Film» Академиясын (film making) қызыл дипломмен тәмамдаған. Ол бүгінде продюсер, режиссер, сценарист. «Сұр қарлығаш» және «Теміржол бақылаушысы» картиналарда жұмыс істеген.