Еске салайық, жарыстың алғашқы екі күнінің қорытындысы бойынша «Алматы» мен «Атырау» командалары турнир кестесінде 28 ұпаймен қатар келе жатқан еді. Алғашқы 2 турда «павлодарлықтардан» 3:0, 3:1 есебімен басым түскен «атыраулықтар» кеше күтпеген жерден 1:3 есебімен жеңіліс тапты. «Алматылықтар» өскемендіктерді («Шығыс-ҚорғасынҚұрылыс») 3:0 есебімен ойсырата жеңіп, жеңісті сериясын (3:0, 3:1) одан ары жалғастырды. Ал үздік үштікті түйіндеп тұрған Оралдың «Конденсаты» қызылжардың «Есілін» 3:1 есебімен ұтып, 27 ұпаймен атыраулықтарды өкшелеп келеді. Оралдықтар қызылжарлықтарға 1-ші турда 2:3 есебімен ұтылып, 1 ұпайды қанағат тұтса, 2-ші турда 3:0 есебімен ойсыра ұтып, 3 ұпайды түгел өз қоржынына салған еді.
Бүгін енді «Павлодар» мен «Есіл», «Алматы» мен «Атырау», «ТНК Қазхром» (Хромтау) мен «Шығыс-қорғасынҚұрылыс» өзара күш сынасады. Павлодарлықтар өз қарсыласына бұған дейін 2 рет 3:1 болып ұтылса, алматылықтар атыраулықтарды 3:0, 3:1 есебімен жеңіп, өз басымдығын танытқан. Хромтаулықтар болса алғашқы турда 3:0 есебімен жеңгенімен, екінші турда 2:3 болып жеңіліп, ұпай бөліскен еді. Ертең командалар бір күн тынығып, 13-15 күндері жарысты одан әрі жалғастыратын болады.
