Жиын барысында қаланың даму бағдарламасын қабылдау кезінде қала тұрғындарының пікірі ескерілетіні айтылды.
Бағдарлама жобасы ертең almaty.gov.kz сайтында жарияланып, көпшіліктің талқысына түсетін болады. Қала тұрғындары келесі айға дейін ұсыныстарын almaty2020@a-a.kz электронды мекенжайына жібере алады.
Бұл — Нұрсұлтан Назарбаевтың Ұлт жоспарының 100 нақты қадамын іс жүзінде жүзеге асырудың бір тетігі, дейді мамандар.
Аталған жобаны жасауға мемлекеттік органдардың ғана емес, белгілі «МcKinsey&Company» компаниясының сарапшылары тартылды.
Сондай-ақ, даму бағдарламасын жан-жақты талқылайтын қоғамдық кеңес құрылады. Оған қаладағы беделді үкіметтік емес ұйымдар мен қаржы институттарының, салалық қауымдастықтардың өкілдері, қоғам қайраткерлері кіреді. Жақын арада салалық топтардың сұхбат алаңы ұйымдастырылады.
«Алматы-2020» бағдарламасында дамудың 7 негізгі бағыты қарастырылған: жайлы қала, қауіпсіз қала, әлеуметтік қала, экономикалық тұрақты қала, жеке капитал мен бизнеске жайлы қала, белсенді азаматтар қаласы, бейімделген қала.
«Қаланың ең басты байлығы адамдар, олардың шығармашылық әлеуеті мен ақыл-ойы. Қазіргі таңда ешбір қаланың дамуы тұрғындардың белсенді араласуынсыз шешілмейді. Ортақ мәселені шешуге бағытталған ортақ мүдде қала дамуының басты қозғаушы күші. Алматы — белсенді азаматтар қаласы. Мұнда азаматтық қоғам ашық дамып келеді», — деді қала әкімі Бауыржан Байбек.
