Бұл туралы Caravan.kz медиа порталы хабарлайды.
Ақерке Бүркітбай Тимур Балымбетовке берген сұхбатында орденге қатысты қоғамда болған дау күйеуі үшін ауыр тигенін жасырмады.
“Тимур, сенің үйіңде отырғанда бәріміз Әлиді құттықтадық. Сол жерде фотоға түсіріп, желіге салдық. Негізі мен сала бер, лайықсың деп айтып едім. Ертеңіне дау басталып кетті. Өзіміз де қорқып кеттік. Кореяда осындай шудан көп әртіс өздеріне қол жұмсап жатыр. Әлидің сол кездегі ішкі жағдайында қандай арпалыс болғанын біз сырттай көрдік. Қолымыздан келгенше, жанында болып, қолдауға тырыстық. Тіпті, дұрыс қолдап жатырмын ба, артық ештеңе айтып қоймадым ба деп те ойладым. Өте қиын кезең болды. Оны да жеңіл көретін адамдар болуы мүмкін. Оның ішінде анамыздың атына да өте ауыр сөз келді. Халық әртісі болмаса да, ешбір ана өзінің баласы үшін ондай сөз естімеуі керек», – деді Ақерке Бүркітбай.
Сондай-ақ, ол Әли Оқаповты анасы Роза Рымбаеваның ерекше қолдағанын да айтты.
“Бұл жағдайға бір адамдардың да қатысы болуы мүмкін деп ойлаймын. Өйткені, халық жауындай көрді. Сол оқиғадан кейін Әли бір апта нәр татпады, басын көтермеді. Көз алдымызда солып, өртеніп бара жатқандай болды. Анамыз үйіне шақырып, көңілімізді аулады. Ол кісі ештеңе болмағандай, шай тамағын дайындап, Зейінді бақты. Аналық махаббатын сезіндіріп, қолдау білдірді. Өйткені 50 жыл сахнада жүргенде естімеген сөзі қалмаған. Ол ешкімнің сөзін көңіліне алмайды. Әлиге де соны айтып, еңсесін көтеруді өтінді»,– деді әнші.
Еске сала кетейік, 2023 жылдың қазан айында әнші Әли Оқапов «Құрмет» орденімен марапатталған еді. Әлеуметтік желілерде бұл жаңалық қолданушылар арасында дау тудырып, кейбірі Оқаповты «бұл марапатқа лайық емес» деген пікір білдірген еді.