Бұл туралы Caravan.kz медиа-порталы Tengrinews.kz-қа сілтеме жасап хабарлайды.
Ақпанда республиканың басым бөлігінде жауын-шашын мөлшері қалыпты деңгейге жуық, батыста, оңтүстік, оңтүстік-шығыс және Шығыс Қазақстанның таулы және тау бөктеріндегі өңірлерінде қалыпты деңгейден артық болуы мүмкін.
"Бірінші онкүндіктің басында Сібір антициклоны әсерінен Қазақстанның басым бөлігінде аяз және аздаған жауын-шашын болуы мүмкін. Ал республиканың батысында батыс және оңтүстік циклондар әсерінен жаңбыр мен қар жауады, секундына 20 метрге дейін жел күшейіп, тұман және көктайғақ құбылыстары болуы мүмкін", — делінген хабарламада.
Содан кейін циклон солтүстік-шығыс бағытта қозғалуына байланысты елдің қалған бөлігінде жауын-шашын жауып, жел тұрады.
Температура
Ақпанның бірінші онкүндігінің бірінші жартысында Қазақстанның оңтүстігі мен батысында күндізгі ауа температурасы жоғарылайды.
"Бірінші онкүндіктің ортасында еліміздің солтүстігінде және орталығында түнде -10-20 градустан -5-13 градусқа дейін, күндіз -5-15 градустан 0-8 градусқа дейін болады. Республиканың шығысында температура түнде -18-23 градустан -12-17 градусқа дейін, солтүстік-шығыста -28-33 градустан -20 градусқа дейін, күндіз -10-15 градустан -5-10 градусқа дейін көтеріледі", — деді мамандар.
Ақпанның екінші және үшінші онкүндіктерінде барикалық түзілімдер ауысуына байланысты ауа райы тұрақсыз болып, екпінді жел тұрып, жауын-шашын жауады. Еліміздің солтүстік-батыс жартысы мен батысында жауын-шашын, боран, оңтүстігінде кейбір күндері шаңды дауыл болады.
"Шығыс Сібір аудандарынан келетін суық антициклон әсерінен температура төмендеуі мүмкін: батыста және солтүстік-батыста түнде 22 градусқа дейін, күндіз 10 градусқа дейін; солтүстік жартысында түнде 35 градусқа дейін аяз, күндіз 18 градусқа дейін; оңтүстік жартысында түнде 15 градусқа дейін аяз, күндіз 3 градусқа дейін жылы болады", — деді Қазгидромет өкілі.
Кейбір күндері Иран мен Орта Азия аудандарынан жылы ауа массалары келіп, ауа температурасы: батыста түнде -5 градусқа дейін, күндіз +8-ге дейін; солтүстік-батыста, солтүстікте, орталықта және шығыста түнде -10 градусқа дейін, күндіз +3 градусқа дейін; оңтүстікте, оңтүстік-шығыста және оңтүстік-батыста түнде -5 градусқа дейін болып, күндіз +12 градусқа дейін көтерілуі мүмкін.