АҚШ үкіметі ҚР төтенше жағдайлар жөніндегі Агенттігіне техногендік апат кезінде шұғыл көмек көрсетуге арналған жабдықтарды табыс етеді

Бүгін, 25-маусымда Алматыда АҚШ үкіметі ҚР төтенше жағдайлар жөніндегі Агенттігінің Алматы қалалық департаменті басшылығына техногендік апаттар мен лаңкестік шаралар кезінде шұғыл көмек көрсетуге арналған трейлер табыс етеді. Бұл туралы KZ-today тілшісіне Қазақстандағы АҚШ елшілігінің баспасөз қызметінен хабарлады.

Трейлер химиялық заттардың төгілуі тәрізді түрлі төтенше жағдайларға шұғыл әрі тиімді жауап қатуға арналған жабдықтармен қамтамасыз етілген.

Жабдық дипломатиялық қауіпсіздік Бюросы тарапынан антитеррорлық көмек бағдарламасы бойынша Қазақстанға төтенше жағдайларға байланысты көрсетілетін көмек аясында беріледі. Бағдарламаның басты мақсаты — түрлі тренингтер өткізу, жабдықтар беру және техникалық көмек көрсету арқылы лаңкестікпен күресте АҚШ-пен ниеттес елдердің ресурстарын арттыру болып табылады.