Ақтау ІІБ-ның қызметкерлері 77 грамм героин тәркіледі

Ақтау ІІБ-ның есірткі саудасымен күрес бөлімінің қызметкерлері "Мак-2004" атты жедел іздестіру шаралары барысында қаладағы ықшамаудандардың бірінен 1965-жылы туған, бұрын істі болған азаматтан 77 грамм есірткі затын тәркіледі,- деп хабарлайды KZ-today тілшісі.

Сараптама қорытындысы есірткі затының героин екенін көрсетіп берді. Тұтқынның айтуынша, ол есірткіні тауып алып, жеке тұтыным үшін сақтап қойған.

Қазір тұтқын Ақтау ІІБ-ның уақытша тергеу қапасында отыр. ҚР Қылмыстық кодексінің ірі көлемдегі есірткі заттарын алыпсатарлық мақсатымен заңсыз сатып алу немесе сақтау жөніндегі 259-бабы, 2-тармағына сәйкес ол 3-7 жылға бас бостандығынан айрылып, мүлкі тәркіленуі мүмкін.