Бұл туралы КТК хабарлайды.
Десе де, олар 10 жыл бойы үміттерін үзбей, күтумен келеді. Осы уақыт ішінде құрылыс компаниясы қайта-қайта ауысып, үй әлі де толығымен бітпепті. Дегенмен, жергілікті басшылар пәтер иелері үшін мәселе жақын арада шешіледі деп отыр. Ал, осы үйдің төменгі қабатынан кеңсе алған 30 адамның не ақшасыз, не кеңсесіз қалатын түрі бар.
Бұл үлескерлердің 7 жыл бұрын су жаңа пәтерге қоныстанулары қажет еді. Бірақ, олар әлі баспананы армандаумен жүр. Оған құйылған ақшаны да жұрт қайтара алмаған.
–Өзім бақандай 6 жыл бойы пәтерімді ала алмай жүрмін. Жұрт осы уақыт ішінде екі-үшеуден балалы болып жатыр. Ал, ақшасы баяғыда төленген баспана әлі жоқ. Әбден шаршадық, дейді үлескер Анар Батыхова.
Жұрт баспанаға 2006 жылдан бастап қаржы құйған. Артынша, құрылыс компаниясымен соттасып, басшысы қылмыстық жауапқа тартылыпты. Сөйтіп, үлескерлерге мемлекет араша түскен екен. Яғни, қазынадан 200 миллион қаржы бөлініп, жаңа мердігер келіпті. Бірақ, жұрттың бас қайғысына айналған мәселе әлі күнге дейін шешілген жоқ.
–Осы уақыт ішінде қанша ақшадан айырылдық. Қаржыны несиеге алғанбыз. Біз банкке осы пәтерге алған ақшадан 2 жарым есе артық төледік. Бұған ешкімнің басы ауырмайды, деді үлескер Людмила Зуб.
Бас қайғыға айналған мәселе басталғалы Ақтауда 7 әкім өзгеріпті. Бәрі де үлескерлерге уәдені үйіп төккен. Бірақ, түрлі кедергілер шығып, үй пайдалануға берілмей келеді. Енді мәсілесе жеделсатыға тіреліп тұр екен.
–Жеделсаты мәселесіне қатысты кеше ғана Могилевтегі зауытпен сөйлестік. Олар тапсырыстың түскенін растады. Келісім-шарт бар. Оған сәйкес, 30 қарашада тауарды бізге қарай жөнелтеді. Жеделсатылар бізге желтоқсанның басында жетеді деп отырмыз, дейді Ақтау қаласы әкімінің орынбасары Нұрлыбай Аққұлов.
Бітудің алдында тұрған үйдің кем-кетігі де бастан асады. Дегенмен, жұрт оның бәріне көз жұмуға дайын. Енді жергілікті басшыларға сенсек, үлескерлер жаңа жылдың басында қоныс тойын тойламақ. Ал, осы үйдің төменгі қабатындағы кеңсеге ақша құйған 30-ға тарта адамның жер сипап қалатын түрі бар. Себебі, құрылыс компаниясы оны сатып, мемлекеттен бөлінген 200 миллионды қайтармақшы екен.