Мерей Қалышева әу баста кәсіпкерлер палатасында «Жас кәсіпкер» бағдарламасы бойынша бір айлық курс оқыды. Оқып жүргенде-ақ 600-ге жуық халық тұратын өз ауылынан наубайхана ашуды мықтап ойға алды, деп хабарлайды ҚазАқпарат.
Оқуды аяқтап, жобасын қорғаған соң оған 505 мың теңге көлемінде грант берілді. Ол қаражатқа келіншек 30 қалып сиятын пеш, қамыр илеуші құрал және нан пісіретін қалып сатып алды. Үйінің ауласындағы жазғы асхананы наубайхана етіп жабдықтады.
Наубайханада нан күн сайын пісіріледі. Бір бөлкенің бағасы – 100 теңге. Жұма сайын кәсіпкер нанды 10 теңгеге арзандатып сатады. Арасында торт, кекс, бәліш пісіруге тапсырыс қабылдайды.
Мерей бірнеше мұқтаж отбасыны өз қамқорлығына алған. Оларға тегін нан беріп тұрады.
«10-15 жыл бұрын жергілікті наубайхана жабылып қалды. Ал басқа жақтан әкелінетін нан бәріне бірдей жете бермейді. Үйде өзің пісірген қолдың нанына не жетсін. Мен өзім қамырдан әртүрлі тағамдар әзірлегенді жақсы көремін, тіпті аспаздық курсын аяқтадым. Наубайхана ашқанға дейін тапсырыспен әрдеңе пісіріп жүрдім. «Жас кәсіпкер» жобасы арманымды орындауға көмектесті. Екі баланы жалғыз өзім асырап отырмын, сондықтан өз бетімше кәсіп ашуға жүрексінетін едім. Бірақ осы жоба арқылы білім алып қана қоймай, жобамды қорғап, мемлекеттік грантты жеңіп алдым», — дейді Мерей Қалышева.
Шағын бизнестің ашылғанына үш ай ғана өткен. Бірақ ол клиенттерінің көңілінен шығып үлгерді. Болашақта Мерей наубайхананы кеңейтіп, бірнеше жұмыс орнын ашқысы келеді.
Мұғалжар ауданындағы кәсіпкерлер палатасы филиалының мәліметінше, бүгінде ауданда 3,5 мың кәсіпкерлік нысан бар, оның 3202-сі жұмыс істеп тұр.
«2019 жылы 470 аудан тұрғыны «Бастау» бағдарламасымен білім алып, оның 195-і бизнес-жобасын қорғады. 90 адам мемлекетітк грантқа ие болды. «Жас кәсіпкер» жобасы аясында 118 адам біліп алып, оның 79-ы жобасын қорғады. 54 жас грант алып, кәсібін бастады», — дейді филиал директоры Бернияз Ділімов.