Бұл туралы Aktobenews.kz тілшісіне Сағи Жиенбаев атындағы облыстық балалар және жасөспірімдер кітапханасының директоры Гүлжайнар Қалдина хабарлаған.
«Сайыстың шартына сәйкес, қатысушы Ғазиза Жұбановаға немесе Жұбановтар отбасына бір өлең арнауы тиіс. Екінші өлең Ақтөбе өңіріне арналады. Еркін тақырыпта бір өлең бар. Авторлар ұсынатын өлеңді компакт-дискіге және А4 көлемді қағазға жазып, бүркеншік атын жазады. Оны бір конвертке салады. Екінші конвертке өзі туралы толық мәліметті, телефонын, мекен-жайын және жолдаған өлеңдерінің тақырыбы мен бүркеншік атымен бірге өз аты-жөнін, жеке құжаттың көшірмесін жолдайды», — деді Гүлжайнар Қалдина.
Сайысқа 14-40 жас аралығындағы ақындар қатысуға тілек білдіре алады. Қазан айының басында жеңімпаздарға қаржылай сый-сияпаттар табысталады.
Гүлжайнар Қалдинаның сөзінше, республикалық мүшәйра облыс әкімі Бердібек Сапарбаевтың қолдауымен өтеді. Аймақ басшысының ұйғарымымен қомақты қаражат қарастырылған.
Бұдан басқа, С.Жиенбаев атындағы кітапхана алғаш рет Ақтөбе қаласында «Алаш туы астында» деп аталатын аймақтық мүшәйра ұйымдастыруда. Бұл сайыстың талаптары республикалық мүшәйраға ұқсас. Тек бұл жолы Жұбановтар отбасына емес, Алаш арыстарына өлең арналуы тиіс. Оған 14-35 жас аралығындағы авторлар сайысқа қатыса алады. Жеңімпаздар бағалы сыйлықтармен марапатталады.