Футболдан әлем чемпионатының сенбі күні өтетін ширек финалында Бельгия мен Аргентина құрамасы кездеседі.
Осы ойынды тамашалау үшін шамамен 100 мың аргентиналық Бразилиаға ағылмақ, деп хабарлады шетелдік БАҚ.
Бастапқыда Аргентина құрамасының жанкүйері 20-30 мың адам болатындығы жоспарланған болатын. Алайда сәл кейінірек бұл сан 50 мыңға жеткен еді. Ал ендігі уақытта Бразилиа полициясы Аргентинадан келетін 100 мың жанкүйердің бабын табу үшін шұғыл қызметке кірісуде.
Кездесу өтетін «Манэ Гарринч» стадионына 70 мың көрермен сыяды. Сол себепті, аргентиналық жанкүйерлердің жартысы жасыл алаңдағы ойынды теледидардан не болмаса стадионға бірнеше шақырым жерге орнатылған алып экраннан тамашалайды.
Айта кетерлігі, Бразилия елордасына келетін бельгиялық жанкүйерлердің саны әлдеқайда аз болатындығы күтілуде.
