«АрселорМиттал Теміртау» компаниясы 2013 жылы үш мың адамды қысқартпақ

Бұл туралы «Интерфакс-Қазақстан» агенттігіне «Жақтау» кәсіподақ комитеті төрағасы Владимир Дубин мәлім етті. Оның айтуынша, компанияның бас директоры Виджай Махадеванның 14-желтоқсандағы №592-ші бұйрығына сәйкес металлургиялық комбинат бөлімшелері басшылары 2013 жылы персонал санын 12 мың 948 адамға дейін қысқартуы тиіс. «Қазір комбинатта 15 мың 988 адам жұмыс істеп жатыр. Сонда қалған 3 мың 40 адам қайда кетеді? «Арселордың» жоспарында оларға орын жоқ», - дейді В.Дубин. Ол бұйрықты естігеннен кейін В.Махадеванға хат жолдап, осы жайтты түсіндіріп беруін өтініпті. «Менің қолыма тиген жауапта компания басшылығы ешкімді қысқартпайды деп жазылған», - деді В.Дубин. Енді ксіподақ облыстық Бақылау және әлеуметтік қорғау департаментіне өтініш жазып, меткомбинат басшылығына қатысты шара қолдануды талап етпек.