Ұлттық Ұланның мерзімді қызметтегі сарбазы Ербаян Мұхтар 2023 жылдың соңында ауыр бас-ми жарақатын алып, комаға түскен. Ұзақ уақыт бойы Түркияда ем алғаннан кейін, Ербаян Мұхтардың жағдайы жақсара бастады, деп хабарлайды Caravan.kz медиа порталы.
2025 жылдың 18 қаңтарында Ербаян Мұхтардың отбасын қолдайтын заңгер және құқыққорғаушы Инга Иманбай жігіттің денсаулығындағы айтарлықтай жақсару туралы айтқан еді. Оның айтуынша, Стамбұлда Ербаянға басына сәтті ота жасалып, емделген, мұрыннан катетер мен зондтар алынған.
«Ол салмақ қоса бастады, роботтың көмегімен қозғала алады. Біртіндеп өздігінен тамақтана бастады. Дәрігерлердің болжамы жақсы, бірақ толықтай қалпына келу үшін уақыт қажет. Емі Стамбұлда жалғасып жатыр», — деп жазды Инга Иманбай.
Ербаян Мұхтар әскери бөлімде ауыр ми жарақатын алған. Ол комаға түскен. Ата-анасына оның дәретханада құлап, басын плиткаға ұрып алғаны айтылған. Алайда ата-анасы бұл нұсқамен келіспеді. Олардың айтуынша, Ербаян жарақат алған кезде оның жанында кем дегенде жеті адам болған.
Айта кетейік, Қазақстанда әскери сарбаздардың өлімі соңғы жылдары өзекті мәселеге айналды. Депутаттар мен қоғам белсенділері әскердегі әлімжеттік пен өзіне қол жұмсау фактілерінің ушығып кеткеніне алаңдаушылық білдіріп, үкіметтен нақты шаралар қабылдауын сұрап жатыр.
«Әскердегі әлімжеттік мәселесі 2022 жылдан бері көтеріліп келеді. Алайда жағдай түзелмек түгілі, ушығып жатыр. Сарбаздардың әскерде жарақат алып, тіпті қайтыс болуы тоқтар емес», — деген еді депутат Нартай Аралбайұлы.
Соңғы үш жылда әскерде 270 сарбаз қайтыс болған. 86 суицид тіркелген, 20 әскери адам өз-өзіне қол салуға оқталған.