Бұл туралы Caravan.kz медиа порталы kaz.inform.kz-ке сілтеме жасап хабарлайды.
— «Құрылыс кодексі» жобасын қарау барысында жұмыс тобы мен ұсынған түзетуді қолдады. Яғни, Жер кодексінің 109-бабына енгізілген өзгерістер арқылы Астана мен Алматыдағы көшелерде орналасқан ақылы тұрақтарды алып тастаймыз, — деп жазды Бақытжан Базарбек.
Депутаттың айтуынша, Алматы қаласында бұған дейін жеке фирмалар арқылы ақылы тұрақтар ұйымдастырылып, одан түскен қаражат қаланың емес, делдал компаниялардың пайдасына жұмыс істеген.
— Инфрақұрылымға ешқандай инвестиция салынған жоқ, тұрақтарда тәртіп орнаған жоқ. Тек күмәнді жолмен иемденілген орындар мен сол арқылы байығандар ғана болды. Дағдарыс кезінде халықтың есебінен табыс табу — қоғамға қарсы қылмыс, — деді Бақытжан Базарбек.
Оның бастамасын бірнеше депутат қолдаған. Қазір түзету салалық комитеттің қарауында.
— Мен сенемін, әділетсіз ақылы тұрақ жүйесі толық жойылады. Бұл әділеттіліктің орнауына жасалған нақты қадам. Енді дүйсенбі күні салық комитетінің соңғы шешімін күтеміз, — деп қорытындылады депутат.
