Аудан әкімі Астананың тарихы Қазақстан тәуелсіздігі жылнамасының ең жарқын кезеңіне айналғандығын жеткізді. «Астананың ауыстырылуы мемлекетіміздің әрі қарай дамуы үшін маңызды болды. Астана жаңа Қазақстанның саяси, экономикалық, мәдени өмірінің орталығына айналды», -деді Б.Торғаев халық алдында сөйлеген сөзінде.
Сонымен қатар ол Астанға әлемге танымал сәуетші шеберлердің, оның ішінде Кисе Куракава мен Норманн Фостердің таңғажайып архитектуралық жобалары іске асырылғандығын айтып өтті. «Осы белгілі сәулетшілердің ұсынған тұжырымдамасының арқасында Астана қоршаған ортамен үйлесімді дамып, өзінің заманауи кескіндерімен жұртшылықты таң қалдыруда», -дейді аудан әкімі.
Астананың болашағы зор екендігі баршамызға белгілі. Осы тұста Б.Торғаев ҚР Президенті Нұрсұлтан Назарбаев Астананы әлемнің дамыған 30 елінің астанасы қатарына кіру міндетін қойғандығын да атап өтті. «Бүгіннің өзінде Астана осы үлкен мақсатқа қол жеткізу үшін айтарлықтай жетістіктерге жетті деуге болады. Астананы құттықтау үшін әлемнің әр түрлі мемлекеттерінен беделді саясаткерлер, дипломаттар, эстрада жұлдыздары, журналистер мен ғалымдар ағылуда», -деді Б.Торғаев.
