Астанада биылғы 7 айда жол апатынан 41 адам қаза тапты

Биылғы жылдың 7 айында Астанада 385 жол апаты тіркелді. Соның салдарынан 41 адам қаза тауып, 470 адам жарақат алды. Бұл туралы бүгін, 15-тамызда өткен баспасөз мәслихатында Астана қалалық ішкі істер департаментінің жол полициясы басқармасы бастығының міндетін атқарушы Сергей Малый құлағдар етті,- деп хабарлайды KZ-today тілшісі.

«Өткен жылғы осы мерзіммен салыстырғанда жол апаттарының саны 11%, қаза тапқандар саны 8,8%, зардап шеккендер саны 16%-ке кеміді»,- деді С.Малый.

Оның айтуынша, жол апаттарына қатысты ахуалды тұрақтандыру үшін жол полициясы инспекторларынан арнаулы топтар жасақталып, олар жаяу жүргіншілермен жұмыс істейтін болады. Қаладан шыға берісте апаттан қирап қалған көліктер ескерту ретінде орнатылып, Елордасындағы жол апаттарына қатысты ақпараттары бар панно ілінеді.
Астана қалалық ішкі істер департаментінің жол полициясы басқармасының мәліметіне жүгінсек, қазіргі жағдаймен Елордасында 90 мыңдай көлік тіркелген.