Астанада ЕурАзЭҚ-қа мүше-елдер тарапынан кедендік бақылауды жүзеге асыру мәселелеріне арналған кеңес өтуде

ЕурАзЭҚ-қа мүше-елдер кедендік бақылауды тәуекелдерді бағалау және басқарудың біртұтас жүйесінің негізінде жүзеге асыруы тиіс. Бүгін, 10-наурызда Астанада басталған "Тәуекелдерді бағалау және басқару негізіндегі кедендік бақылау: қолдану тәжірибесі және даму перспективалары" тақырыбы бойынша ұйымдастырылған екі күндік семинар-кеңеске қатысушылар осындай пікір білдірді,- деп хабарлайды KZ-today тілшісі.

Бұл шараны Әлемдік банктің қолдауымен ЕурАзЭҚ Интеграциялық комитеті ұйымдастырып отыр. Семинарға ЕурАзЭҚ-қа мүше Беларусь, Қазақстан, Қырғызстан, Ресей және Тәжікстан мемлекеттерінің кедендік қызметінің сарапшылары қатысуда. Сондай-ақ, оған ЮСАИД, Азия даму банкі, ҚР қаржы полициясы академиясының ғылыми қызметкерлері қатысуда.

Бұл — Әлемдік банктің қолдауымен ЕурАзЭҚ Интеграциялық комитеті ұйымдастырып отырған екінші семинар. Сарапшылардың осындай алғашқы кеңесі 2003-жылдың қараша айында өтті.
ЕурАзЭҚ бас хатшысының орынбасары Серік Пірімбетовтың мәлімдеуінше, «осы жолы тәуекелдерді бағалау және басқарудың ұлттық жүйелерін қолдану барысында жинақталған тәжірибеге баса назар аударылады».
Семинар-кеңес соңында қорытынды құжат қабылданады.