Бұл туралы ҚР Мәдениет министрлігінен хабарлады.
Қазақстан халқы тілдерінің ХІІ-ші республикалық фестивалі аясында өтетін байқауға облыстық және қалалық (Астана және Алматы) байқаулардың жеңімпаздары қатысады.
Байқаудың мақсаты — мемлекеттік тілдің қолданылу аясын кеңейту, тіл мәдениетін көтеру, көркем әдебиетті насихаттауды жандандыру, ел ішінен талапты, талантты жастарды іздеп табу.
Талапкерлердің өнерін бағалап, сарапқа салатын қазылар алқасының төрағасы — жазушы, Мемлекеттік сыйлықтың лауреаты Төлен Әбдік. Қазылар алқасының құрамында сондай-ақ Т.Жүргенов атындағы Ұлттық өнер академиясының сахна тілі кафедрасының меңгерушісі, профессор Дариға Тұранқұлова, «Хабар» Агенттігі» АҚ басқарма төрағасының орынбасары Айдос Үкібаев, жазушы Әнес Сарай, Астана жастар театрының директоры, Қазақстан Республикасының халық әртісі Тілектес Мейрамовтар бар.
Байқауға қатысушылар О.Бөкей шығармаларымен қатар, елімізге белгілі, сөз өнеріміздің дамуына өзіндік үлес қосқан драматург, ақын-жазушыларымыздың шығармаларынан үзінділер оқитын болады.
Республикалық байқау жеңімпаздары ҚР ММ Тіл комитетінің дипломдарымен, грамоталарымен және бағалы сыйлықтармен марапатталады.