Шара автордың шығармашылық еңбегіне 35 жыл толуына арналған. Шоқан Әлмахамбетұлы Төлеш — ҚР Суретшілер одағының мүшесі, ҚР Өнер академиясының академигі, республикалық және халықаралық көрмелерге қатысушы. Оның айтулы еңбегі ретінде Нұрсұлтан Назарбаевқа арнап Алматы қаласында тұрғызған монументін атауға болады.
1992 жылдан бастап оның жұмыстары әлемнің көптеген қалаларының галереяларына қойылып келеді, Қазақстан, АҚШ, Франция, Бельгия, Италия, Швейцария, Лихтенштейн князьдігі, Ұлыбритания, Австрия елдерінің жеке коллециялары мен мемлекеттік мұражайында сақтаулы.
Шоқан Төлеш — өз жұмыстарымен Батыс пен Шығыстың стилистикасын біріктіріп, өнердің көркем түрінен жаңа пластикалық тіл ойлап тапқан мүсінші. Ол материалдарға, өлшемдерге батыл тәжірибе жүргізу арқылы өткен дәуір тарихының терең мән-мағынасын жаңаша сипаттауға қол жеткізді. Осылайша сақ, ғұн, түркі кезеңдерінен келе жатқан ата-баба дәстүрін ХХІ ғасырға сай етіп көрсетті. Шоқан Төлештің әрбір жұмысынан суретшінің арманы мен шалқар шабытын байқауға болады.
