Астанада саңыраулар арасында Қазақстан Республикасының футбол чемпионаты өтеді

Бәсекеге Астана, Семей, Петропавловск, Павлодар, Көкшетау, Ақтөбе, Тараз, Талдықорған, Шымкент және Алматы құрамаларын қамтыған ұзын саны 150 спортшы мен жаттықтырушы қатысады.

Бұл жарыс — алдағы жылы Малайзияда өтетін Азия аймағының іріктеу ойындарына қатысатын еліміздің Ұлттық құрамасына мықты спортшыларды таңдау мақсатымен өткізіледі. Ең таңдаулы екі құрама 2005-жылы Австралияның Мельбурн қаласында өтетін саңырау-мүгедектер арасындағы Олимпиада ойындарына жолдама алады.
Футбол спортынан мүгедектер арасындағы Ұлттық біріншілік елімізде 1993-жылдан бері ұйымдастырылып келеді. Бұған дейін Қазақ ССР-інің құрамасы 1986-жылғы Кеңестік чемпионатта бірінші орынды жеңіп алған болатын. Ал 1996-жылы тәуелсіз Қазақстан құрамасы Малайзияның Куала-Лумпур қаласында өткен Азиялық ойындарда 12 құраманың арасында 5-орын иемденді. 2000-жылы Тайваньның Тайбэй қаласында Қазақстандық спортшылар бір саты жоғары көтеріліп 4-орынды жеңіп алды. Қазақстан құрамасы сондай-ақ, бұдан басқа да көптеген турнирлерге қатысып жүлделі орындарда көріне білді.
Чемпионатты өткізуге ҚР туризм және спорт жөніндегі Агенттігі, штатты ұлттық құрамалар мен спорттық резервтер дирекциясы, мүгедек-спортшылардың Астанадағы «Қайсар» спорт мектебі , «ЭксонМобил Қазақстан инк.» компаниясы мен Алматы тоқыма комбинаты қатарлы мекемелердің қолдауы арқасында жүзеге аспақ.