Астанада «Жастар бірлігі апталығы» ХІІ қалалық фестивалі басталады

Фестиваль аясында жоғары және арнайы оқу орындарында білім алатын жастар арасында барлығы 17 іс-шара өткізіледі, соның ішінде қан тапсыру акциясы бар.

Бүгін шараның басталуына орай баспасөз мәслихаты өтті. Астана қаласы мәслихатының депутаты Елдар Қатенов атап көрсеткендей, 1997 жылдан бері өткізіліп келе жатқан фестиваль жылда 10 қараша күні басталады. Дәстүрге айналған бұл күн кейін Астана қаласы жастарының күні болып бекітілді. Фестивальдың қорытындысы 17 қараша — Студенттердің бүкілдүниежүзілік күні шығарылады.
Биыл жастар апталығына жоғары және арнайы білім беретін барлығы 20 оқу мекемесі қатысады. Жалынды жастардың шығармашылық, спорттық және интеллектуалдық талаптарын айқындап, қолдау білдіруді көздейтін фестиваль барысында ұйымдастырылатын іс-шаралардың бағыты әртүрлі. Сондықтан әрбір жаста өзінің қабілеттін көрсетуіне мүмкіндігі бар. Бір жетіге созылатын додаға барлығы 8 мыңнан астам жас қатысады деп күтілуде.
Өткізілетін шаралардың арасында «En Counter» эсктрим-ойыны, ұлтжандылыққа тәрбиелеуді мақсат ететін — «Патриот» акциясы, қарттар үйі мен коррекциялық мектепте өтетін «Қамқорлық» акциясы, қазақ және орыс тілдерінде өтетін КВН ойындары, «Екі жұлдыз» шоу бағдарламасы, «Жастар — Ел болашағы» поэзиялық кеші және қан тапсыру акциясы бар.
Қан тапсыру акциясы барысында қалалық Қан орталығымен жасалған келісімге сәйкес, арнайыландырылған көлік үш күн қатарынан апталыққа қатысушы барлық ЖОО-лар мен арнайы оқу мекемелерін аралайды. Е.Қатеновтың сөзіне қарағанда, бұған дейінгі акцияда мұқтаж жандарға көмектесуге 1 мыңға жуық жас ниет білдірген.
Депутаттың айтуынша, фестиваль ұйымдастырылып келе жатқан 12 жыл бойы С.Сейфуллин атындағы Қазақ агротехникалық университеті «Ең үздік ЖОО» саналып келеді. «Талантты жастар барлық оқу орнында бар. Бірақ оларды анықтап, қолдау білдіре отырып шыңдауға мүмкіндіктер жасау барлық білім мекемесінде жолға қойылмаған. Аграрлық университетте студенттерге тек университет ішіндегі емес, сондай-ақ қалалық, республикалық және халықаралық деңгейлердегі байқауларда өнер көрсетуге мүмкіндіктер жасалған», — деп атап өтті ол.