Ұлы Отан соғысындағы Жеңістің 65 жылдығы мен Б.Момышұлының 100 жылдығына арналған фестиваль ҚР Мәдениет министрлігінің ұйымдастыруымен, Жамбыл облысы әкімдігінің қолдауымен қыркүйектің 20-27-сі күндері аралығында өтті.
Фестиваль отандық театр репертуарларының идеялық-көркемдік деңгейін арттыру, ҰОС батырларына арналған тақырыпта жаңа сахналық қойылымдар тудыру мен жастарды патриоттық тәрбиеге баулып, бағыт-бағдар беруге негізделген. Шараның басты мақсаты — Отан қорғаушылар бейнесін театр өнері тәсілдерімен сомдау, театр ұжымдарының шығармашылық ізденістерін ынталандыру.
Фестивальға республикамыздың үздік деп танылған барлығы 9 театры қатысты. Атап айтқанда, Астанадағы Қ.Қуанышбаев атындағы Қазақ музыкалық драма театры, Алматы қаласының Мемлекеттік неміс драма театры, «Ақсарай» мюзикл театры, Ғ.Мүсірепов атындағы Қазақ мемлекеттік академиялық балалар мен жасөспірімдер театры, Мемлекеттік республикалық корей музыкалық комедия театры, сондай-ақ Станиславский атындағы Қарағанды облыстық орыс драма театры, «Дариға-ай» Шығыс Қазақстан облыстық жастар театры, С.Қожамқұлов атындағы Жезқазған қалалық музыкалық-драма театры, М.Горький атындағы Мемлекеттік орыс драма театры (Астана).
Фестиваль қорытындысында қатысушылар «Ең үздік ер адам бейнесі», «Ең үздік сценографиялық шешім», «Ең үздік әйел бейнесі» және т.б. аталымдар бойынша марапатталды. Ал бас жүлдені елордалық Қ.Қуанышбаев атындағы Қазақ музыкалық драма театры жеңіп алды.
Театрдың баспасөз қызметінен мәлім еткендей, театр ұжымы фестивальға А.Дударевтің «Кеш» қойылымын алып барды.
«Мәскеуден арнайы шақырылған театр сыншысы Ресей театр өнері академиясының (ГИТИС) профессоры Анна Степанова Қ.Қуанышбаев атындағы Қазақ музыкалық драма театры қойған қойылымды ерекше атап өтіп, режиссер мен актерлерге ризашылығын білдірді. Спектакльдің қоюшы режиссеры ҚР Еңбек сіңірген қайраткер Болат Ұзақов. Ал рольдерді ҚР Еңбек сіңірген әртісі Рымкеш Омарханова мен ҚР Еңбек сіңірген қайраткері Бекболат Құрманғожаев сомдады», — делінген баспасөз қызметінен.