Атырау банкоматтарының бірінен қолма-қол ақша шығару кезінде номиналы екі мың теңге болатын арнайы «пара» деген белгісі бар ақша шыққан. Жазу қалыпты жарықта көрінбейді, алайда ультракүлгін аппараты арқылы тексергенде «взятка» сөзі тайға таңба басқандай жазулы тұр, деп жазды «Ақ Жайық».
«Банкоматтан ақша алғанша әмиянымда он мыңдық және бес мыңдықтардың болғанын анық білемін және банкоматтан екі мың теңге, мың теңгелік ұсақ ақшалармен он мың теңге алдым. Қателесуім мүмкін емес, телефоныма ақша алынғаны туралы хабарлама да келген», — деп түсіндірді белгісі бар ақшаны алған ер адам. «Қазақстан ұлттық банкі» РММ Атырау филиалы қолма-қол ақша және кассалық операциялармен жұмыс жөніндегі экономикалық бөлімінің бас маманы Әйгерім Бейсенғалиева ақша айналымында мұндай банкноттың жүрмейтінін айтты. «Ұлттық банктің №477 қаулысымен бекітілген ұлттық валюта банкноттары мен тиындарының төлем қабілеттілігін анықтайтын ережелер бар. Ультракүлгін сәулесімен көрінетін бөтен жазуы бар банкноттар тозды деп танылады және айналымнан шығарылады», — деді ол. Басылымның жазуынша, купюраны құқық қорғау органдары операция жүргізуге қолдануы мүмкін. Бірақ, мұндай банкноттар Ұлттық банкке берілуі тиіс еді, купюраның айналымға қалай түскені белгісіз.