Бұл туралы Caravan.kz медиа порталы kazinform.kz-ке сілтеме жасап хабарлайды.
Халықаралық әйелдер күні қарсаңында Қазақстан Президенті Қасым-Жомарт Тоқаев Балжан Мұсатаеваға Бауыржан Момышұлы атындағы II дәрежелі «Айбын» орденін табыс етті. Бұл сыйлық оған ерекше еңбегі, ерлігі мен Отанға деген адалдығы үшін берілді.
Фото: Қорғаныс министрлігі
Әріптестері лейтенант Мұсатаеваны қошеметпен қарсы алып, гүл шоқтарын сыйлады. Құрмет қарауыл ротасы салтанатты шараның сәнін келтірді.
— Бұл марапат менің ғана жетістігім емес. Мен оны еліміздің қорғаныс қабілетін нығайтуға өз үлесін қосқан Қазақстан Десанттық-шабуылдау әскерлері мен Қарулы күштерінің барлық әйелінің жанқиярлық еңбегін бағалау деп есептеймін, — деді Балжан.
Балжан Мұсатаева — парашют жүйесін ұшыру желісінде өз бетінше жұмыс істеуге, сондай-ақ оны бақылау мен тексеруге құқығы бар Десанттық-шабуылдау әскерлеріндегі әуе-десанты даярлығын жүргізетін бірден-бір әйел нұсқаушысы. Ол жүзден аса әуеден парашютпен секірген.
