Ауыр атлетикадан халықаралық федерациясының (IWF) атқарушы комитетінің осындай шешімі дүйсенбі күні, қазір әлем чемпионаты өтіп жатқан Парижде жарияланды.
«2014 жылғы әлем чемпионатын өткізуге Астанадан басқа 10-шақты мемлекет таласты. Олардың арасында АҚШ, Ресей мен Түркия бар. Бірақ дауыс басымдығымен атком мүшелері біздің елордамызды таңдады. Бұл кездейсоқ емес», — деп басылым, қазір Францияда жүрген ҚР ауыр атлетика федерациясының төрағасы Қайрат Тұрлыхановтың айтқандарын келтіріпті.
Қ. Тұрлыханов осыншама ауқымды жарыс үшін неліктен Қазақстан таңдап алынғанын өзінше түсіндіреді.
«Қазақстанның халықаралық сахнада саяси беделі бар болуымен қатар экономикалық тұрғыдан тұрақты дамып келеді. Одан басқа, қазақстандық ауыр атлетика шеберлері соңғы олимпиадада және әр түрлі халықаралық деңгейдегі жарыстарда өздерін жақсы таныта білді. Сондықтан енді үш жылдан соң әлемнің күшті штангашыларын күтеміз», — деді Қ. Тұрлыханов.
