«Мемлекеттік комиссияға өз нұсқауларымызбен желтоқсан айында шықпақшымыз. Біздің ұсыныстарымыз мемлекеттік комиссияның отырысында президентке таныстырылады»,- деді бүгін жұмыс тобының жетекшісі Әлихан Бәйменов топ отырысында.
Оның айтуынша, мемлекеттік комиссияның отырысы президенттің төрағалық етуімен желтоқсан айында өтеді.
Ә.Бәйменов басқаратын жұмыс тобы Ата заңды жетілдіру бағытында төрт топтамаға біріктірілген кезек күттірмейтін шараларды ұсынбақшы. Олар парламенттің өкілеттілігін дамытуға, оның үкіметті, Есеп комитеті мен Орталық сайлау комиссиясын жасақтау және олардың іс-қызметіне бақылау жасау құзыретін арттыруға; жергілікті өкілетті органдардың бақылаушылық құзыреті аясын кеңейтуге, жергілікті өзін-өзі басқаруды толыққанды қолданысқа енгізуге жағдайлар жасауға; партиялардың саяси жүйедегі рөлін күшейтуге; әділеттілік және құқық қорғау органдары жүйесін жетілдіруге бағытталады.
Жұмыс тобының атқарған іс-шараларын қорытындылай келе Ә.Бәйменов нұсқаулар қоржынына мемлекеттік комиссияның аясында жұмыс істейтін басқа да жұмыс топтарының ұсыныстары да қамтылғанын атап өтті.
Ақпаратты пайдаланған жағдайда «Kazakhstan Today» ақпараттық агенттігіне сілтеме жасау міндетті
