Кеше Байқоңыр ғарыш айлағының №200 алаңының ұшырылым үстеліне орнатылған Astra-1M ғарыштық аппараты мен "Протон-М" зымыран тасығышын ұшыруға дайындық жұмыстары үшінші ұшырылым күнгі кесте бойынша жүргізілді. Зымыранға жанармай құюға дайындық жүргізілді. Зымыран тасығышқа жанармай құю туралы шешімді мемлекеттік комиссия қабылдауға тиіс.
Еуропаның Astra-1M телекоммуникациялық жер серігін "Протон-М" зымыран тасығышымен 2008 жылдың 6-қараша күні Астана уақытымен 02 сағат 44 минутта ұшыру жоспарланған. Бұған дейін ұшырылым екі мәрте кейінге шегерілді.
Astra-1M жер серігін Еуропаның EADS Astrium концерні SES Astra (Люксембург) компаниясының тапсырысы бойынша жасаған.
Салмағы 6 тоннадан асатын ғарыштық аппарат 36 транспондермен жабдықталған және телекоммуникациялық қызметтер мен телевидение сигналын HDTV форматында жеткізуге арналған. Astra-1M жер серігі геостационар орбитада 15 жыл белсенді жұмыс істеуге тиіс.