Бұл туралы Caravan.kz медиа порталы Sputnik.kz-ке сілтеме жасап хабарлайды.
Қазақстанға келетін туристерге қажетті қызметті брондауға арналған QR-код жүйесі барлық әуежай мен шекара бекетінде болады. Бұл туралы туризм және спорт министрі Ербол Мырзабосынов мәлімдеді, деп хабарлайды Sputnik Қазақстан тілшісі.
Қазақстанға келетін туристер кей кезде такси, байланыс, валюта айырбастау сияқты қызметтерден алданып жатады.
«Оның алдын алу үшін QR-код жүйесі жасалды. Оның ішінде такси, электронды SIM-карта, қонақ үй брондау, негізгі ақпарат пен тіркелу қызметтері жинақталды. Бұл QR-кодтар еліміздің 4 қаласында, яғни Астана, Ақтау, Түркістан және Шымкент қалаларында орналастырылған», — деді Мырзабосынов үкіметтің бүгінгі отырысында.
Оның айтуынша, қазіргі кезде аэропорттар QR-кодтарды орналастыру үшін қосымша қаражат сұрап отыр.
«Осыған орай тәжірибені кең тарату үшін тиісті әкімдіктер мен көлік министрлігінің қолдауы қажет. QR-кодты барлық әуежайға, вокзал мен шекара өткеліне орналастыру керек», — деді министр.
Алдағы уақытта TravelStan бірыңғай мобильдік қосымшасымен қонақ үйді брондау, билеттерді сатып алу, гидтер мен маршруттарды табу, такси шақыру және тағы басқа қызметтер қолжетімді болады. Оның негізгі функционалы жасанды интеллектке негізделген көмекші болады.
Бұл жоба цифрлық даму министрлігімен алдын ала келісілді. Енді қаржыландыру мәселесін мәселесін шешу керек.