Жарияланды: 620

Бас көлік прокуратурасы «Алматы-Атырау» бағытындағы пойызда 39 баланың улануына қатысты тексеріс жүргізуде

ҚР Бас көлік прокуратурасы органдарымен № 41 «Алматы-Атырау» бағытындағы жолаушылар пойызында 39 баланың улану фактісіне орай тексеріс жүргізуде.

Бұл туралы ҚР Бас прокуратурасының баспасөз қызметінен хабарланды. Естеріңізге сала кетейік, 28 шілде күні Қызылорда облысы Белкөл стансасында тағамнан улану белгілерімен оқыс сырқаттануына байланысты 39 бала «Алматы-Атырау» жолаушылар пойызынан түсірілген болатын. Уланғандардың 27 шілде күні жолаушылар пойызының вагон-мейрамханасындағы ас мәзіріне орай тамақтанғаны белгілі болды. «Осыған орай көлік прокуратурасы Желілік ішкі істер бөлімі қызметкерлерімен бірлесіп, теміржол көлігіндегі мемлекеттік-санитарлық-эпидемиологиялық қадағалау басқармасының мамандарын, санитар-дәрігерлерді, бактериологтарды тарта отырып пойыздың вагон-мейрамханасына тексерулер жүргізді. Тексеріс барысында санитарлық-эпидемологиялық қадағалау мамандары асхана ыдыстарынан, мейрамхана жұмысшылары қолдарынан ішек таяқшасына және басқа да инфекцияларды тексеруге қатысты 20-ға тарта сынама алды. Сонымен қатар, вагон-мейрамхананы тексеру барысында санитарлық-эпидемологиялық нормалардың сақталмағаны анықталды. Вагонда шүмектен ағатын ыстық су, ет өнімдеріне сертификаттар болмаған, азық-түліктерді сақтауға арналған тоңазытқыш қондырғылары істен шыққан. Балалардың улануына байланысты қазіргі күні тергеуге дейінгі және зертханалық зерттеу тексерістері жүргізілуде», - делінген баспасөз айғағында.

Пікір қалдырыңыз

Пікір қалдыру тіркелген пайдаланушылар ғана мүмкін