Аудандық мәдениет үйінде өткен «Халқы сүйген батыр» атты ғылыми-тәжірибелік конференцияға Орал, Ақтөбе қаласынан ғалымдар мен өлкетанушылар қатысты. Аудан әкімі Алдияр Халеловтің кіріспе сөзінен кейін Құдайберген Жұбанов атындағы Ақтөбе мемлекеттік университеті гуманитарлық зерттеулер институтының директоры, филология ғылымдарының докторы, профессор Алпысбай Мұсаев, аталмыш институт директорының орынбасары, педагогика ғылымдарының кандидаты, доцент Айсұлу Тасимова және басқалар батыр Бөкенбайдың өмірі мен ерлік жолдарына тоқталды.
Конференция соңында Ақтөбе қаласынан келген «Бөкенбай батыр» қорынының директоры Ізімғали Көбенов соғыс және еңбек ардагерлерімен Бөкенбай Қарабатырұлының ұрпақтары мен зерттеушілерге сыйлыққа шапандар мен естелік сыйлықтар тарту етті.
Содан кейін батырға арналған ескерткіш ашылды. Кесене тәріздендіріліп жасалған биіктікке баһадүр Бөкенбай мен оның ұрпақтары Тіленші, Жоламан батырлардың бейнелері орналастырылған.
Сондай-ақ Бөкенбай батырды еске алуға арналған қазақ күресінен жасөспірімдер және ересектер арасында ашық турнир өткізілді. Жеңімпаз-жүлдегерлер дипломдармен, ақшалай сыйлықтармен марапатталды.
Батыр есімін ұлықтауға арналған шаралар алдағы уақытта да жалғасатын болады.