Батысқазақстандық офицер Е.Қартқожақов үздіктердің бірі атанды

капитан Ерлан Қарт­қожақовқа «Патриоттық тәрбиеге қосқан үлесі үшін» төсбелгісі, «Қазіргі заман қаһарманы» мүсіні және диплом табыс етілді. ҚР Білім және ғылым ми­нистрлігінің бастамасымен өткен шараны «Жас қыран» әскери-патриоттық бір­лестіктерінің республикалық дамыту орталығы мен жас әскери бірлестіктерінің республикалық штабы ұйымдастырды. Егемен еліміздің тарихында алғаш рет өткізілген жоба бүгінгі бейбіт күнде ерлік жасаған қа­зақ­стан­дықтардың еңбегін ескеру­сіз қалдырмай, кейінгі тол­қын­ға үлгі ету, сол арқылы патриоттық тәрбие беруді мақ­сат еткен. Ішкі әскерлер Батыс құрамасы командирінің тәрбие және әлеу­меттік-құқық мәселелері жө­нін­­дегі орынбасары, подполков­ник Қанат Беляковтың ай­туынша, облыс әкімдігі жалпы республикалық жоба жөнінде құлағдар еткеннен кейін ақылдаса келе, бұл жобаға Орал гарнизонынан капитан Ерлан Қартқожақовты қатысуға лайықты деп тапқан. Ерлан Батыс құрамасы штатына кіретін арнайы ерекше жасақ отряды командирінің әлеуметтік және құқықтық мәселелер жөніндегі орынбасары болып еңбек етеді. Отан үшін отқа түсуден де, оққа ұшудан да тайынбайтын оғлан еліміздің батыс өңіріндегі арнайы әскери операцияларға қа­тысқан. Бұған дейін Ерлан ерек­ше жасақ тобының аға офицері болған. «Өткен жылдан бастап бұл топтың штаты ұлғайтылып, отряд болып құрылды. Сол кезде аға офицердің моральдық-іскерлік қасиеттері, кәсіби дағ­дылары мен жеке құраммен тәрбие жұмыстарын жүргізудегі шеберлігі бағаланып, отряд командирінің орынбасары етіп тағайындалды. Бүгінде оның қарамағында әскери және қыз­меттік тәжірибесі мол офицерлер жұмыс істейді. Жас офицер жоба бойынша үздік деп танылып, оның еңбегі оң бағаланды. Бұл шараға Ішкі әскерлер құрамасынан 6 адам қатысып, түрлі аталымдар бойынша марапатталды. Қазіргі заманның қаһарманы деп танылған капитан Ерлан Қартқожақовқа марапатты Астанада Ішкі әскер қолбасшысының орынбасары, полковник Әбілсадық Ережепов пен ардагер, генерал-майор Дәулет Салханов табыс етті", - дейді подполковник Қанат Беляков. Ерлан Қартқожақов -Теректі ауданы Шалқар ауылының тумасы. Бала кезінен офицер болып, ел іргесін қорғауды арман етіпті. Сарыөмір ауылындағы Х.Есенжанов атындағы орта мектебін бітіріп, Оралдағы Батыс Қазақстан аграрлық-техникалық университетінде оқыды. Жоға­ры оқу орнын аяқтағаннан бергі өмі­­рі осы әскери бөлімде өтуде. Жас офицер Батыс құрамасы­ның командалық-штабтық түрлі әскери-жаттығуларына белсене қатысып, көзге түскен.