Жарияланды: 530

Биылғы “Алматы – менің алғашқы махаббатым” музыкалық ретро фестивалі ел тәуелсіздігінің 20 жылдығына арналмақ

Биылғы “Алматы – менің алғашқы махаббатым” музыкалық ретро фестивалі ел тәуелсіздігінің 20 жылдығына арналмақ. Сондықтан кеште тек осы уақыт аралығындағы “ең үздік” атанған қазақ әндері орындалатын болады. Бүгін осы шараның дайындық барысы тағы бір пысықталды. Ал ретро әндер кешінің өзі қыркүйектің 17-де, Алматының “Орталық стадионында” өтпек. Фестивальдің телевизиялық нұсқасын біздің арнамыздан көруге мүмкіндік аласыздар.

20 жыл - бұл Қазақстанның енсесі биіктеп, қай салада болмасын керегесі кеңінен жайылған кезеңі. Оған егемен елдің тұңғыш астанасы, Алатау бөктеріндегі әсем қаламыз Алматының өзі куә. Сондықтан да болар, биылға “Алматы – менің алғашқы махббатым” ретро фестивалі тәуелсіздік мерейіне арналмақ. Оған дайындық та ерекше. Ұйымдастырушылардың айтуынша, биылғы фестивальде тек тәуелсіздік таңы тұсындағы хитқа айналған әндер орындалатын болады.

Жанболат Беделхан, “Орда” тобының мүшесі:

-Дайындық тамаша өтті. Бұл жолы біз “Белгісіз жан” әнін орындамақпыз. Себебі бұл ән соңғы жылдардағы үздік ән ретінде бағаланып отыр.

Сонымен қатар, Роза Рымбаева, Нағима Есқалиева, Мақпал Жүнісова сынды әншілеріміздің де үздік әндері жанды дауыспен орындалмақ. Және барлығын дерлік Қорғаныс министрлігінің эстрадалық-симфониялық оркестрінің сүйемелдеуімен. 

Александр Беляков, ҚМ эстрадалық-симфониялық оркестрінің бас дирижері:

- Биылғы фестивальдің тақырыбы тәуелсіздікке арналып отыр. Дайындық та, өздеріңіз көріп тұрсыздар, күшті. 10-шы шіледен бері осында жүрміз. Кештің ойдағыдай өтетініне барымызды саламыз. Келіңіздер, қызықты кеш аясында тәуелсіздік мерекесін бірге өткізейік.

Сонымен, әсем ән мен әсерлі күйге толы ретро кеш 17-ші қыркүйекте “Орталық стадионда” өтеді. Ал фестивальдің телевизиялық нұсқасы біздің арнадан көрсетілетін болады.

Пікір қалдырыңыз

Пікір қалдыру тіркелген пайдаланушылар ғана мүмкін